TÍTULO: As palabras feridas.
AUTOR: Jordi Sierra i Fabra.
EDITORIAL: Galaxia.
COLECCIÓN: Costa
Oeste.
A
editorial Galaxia achégalles aos
lectores mozos esta engaiolante novela
de Jordi Sierra i Fabra, autor
destacado, recoñecido e comprometido dentro da LIX e que grazas a Xesús Domínguez Dono podemos ler na nosa lingua.
A partir dunha estrutura que lembra o
estilo das secuencias cinematográficas, o autor vai desenvolvendo a historia de
Li Huan, o protagonista de 18 anos que, ao longo dos 37 capítulos, máis un intermedio e un final, descubrirá o verdadeiro valor das palabras ditas, lidas, escoitadas,
silenciadas, lembradas e mesmo, imaxinadas, nunha sociedade libre e equitativa.
 |
| Jordi Sierra i Fabra (Foto de Francesc Gómez) |
Todo comeza cando Li Huan é destinado a
facer o servizo militar nunha zona afastada e inhóspita, onde se atopa un campo
de prisioneiros. A súa función, ademais de ser o censor do campo, será a de vixiar a un dos presos máis perigosos,
o 139, un vello profesor e poeta disidente, que cre na dignidade humana a
través do coñecemento e do libre
pensamento.
O
feito de que estea sustentada en diálogos directos, cunha prosa clara, á vez
que poética e guiados por un narrador omnisciente, permite que o lector siga o
protagonista na súa viaxe iniciática cara á verdade e á madurez. Esta queda ben
reflectida no emotivo e tenro final.
As palabras feridas é unha novela dura, real, tenra e moi
atraente que homenaxea a palabra e todo o que o seu uso ou prohibición conleva.
É unha novela humanista que pon de relevo aos lectores mozos a realidade que,
por desgraza, moitas sociedades están a padecer en nome de falsas crenzas e
ideoloxías que só buscan autómatas e non habitantes pensantes.
ALBA PIÑEIRO
