lunes, 23 de septiembre de 2013

CATAVENTO DE POEMAS INFANTÍS (XXIX) Ramiro Fonte






RAMIRO FONTE   (Pontedeume, 1957 – Barcelona, 2008)



NENÚFAR

Nenúfares das lagoas
Quietas, dos mudos estanques;
Para os versos, flores boas,
Para os pintores, diamantes.
Ramiro Fonte




GOLETA, GALEÓN, GAMELA

Se suca os mares do ceo
Unha dourada goleta
É que a goberna un poeta.

Pero se é un galeón
(Outra nave coma ela),
Goberna a tripulación.

Mariñeiro, pon a vela
Da túa branca gamela.





PALABRAS

Palabras do diccionario
Son rosas de invernadoiro,
E as lúas cheas dun lunario,
Cofres baleiros de ouro.

Pero se escribo paxaro
E a mesma palabra leo
(Que non che pareza raro),
El voa libre no ceo.

A lúa en cuarto crecente
Ilumina a miña mente.
¿Poderá unha rosa impura
Proclamar a fermosura?




RULA

Nunca pode ser escola
Unha dourada gaiola.

A rula canta mellor
Nun verso de arte menor.




(Do libro Xardín do pasatempo, editado por Tambre, 2008)